Ko Sisu 'eni mo e founga
04/02/08 , by Posted by: admin
Kau 'Evangelio - Ko Sisu mo 'ene founga
Ko e fatongia pau ‘o e fefine Samelia ‘i he kosipeli ‘a Sione vahe 4, ko e pau ke ne ‘alu ki he vaikeli ‘o Sekope he ‘aho kotoa pe ke ‘utu mai ha’a ne vai koe’uhi ko ‘ene ngaahi fiema’u faka’api. Ka na’e ‘i ai e palopalema, ko e fefine ‘eni na’a ne nofo he mo’ui angahala’ia pea ko ‘ene faka’amu ke ‘oua mu’a na’a lea pe talanoa ange ki ai ha taha ‘i he taimi ko ia te ne ‘alu atu ai ‘o ‘utuvai. Ko ia na’e pau ai ke ne filifili ai ha fo’i taimi pau he ‘aho ke ‘alu tokotaha ai pe ki he vai ‘o ‘utu pea foki ki ‘api.
Na’a ne tui ko e 6 efiafi ko e taimi ‘eni kuo ‘osi mai ai ‘a e ‘utuvai ‘a e kolo, pea ‘ikai ha taha ‘e toe fou ‘o ‘utuvai, ka ko ia tokotaha pe. Pea mahalo pe na’e fa’a faingamalie ‘a ‘ene ‘utuvai ‘i he ngaahi ‘aho ko ia kimu’a. Ka ko e ha e me’a na’e hoko? Fehalaaki? Ko e ‘aho ni ko si’i Sisu ‘oku ne talitali atu ‘i he ve’e vai ke fakatalanoa kiate ia.
‘Oku ou ‘omai pe ha ngaahi fakakaukau heni ketau fakama’unga ki ai, ka ‘oku ou lave’i pe ‘oku lahi pe ‘a e ngaahi kakano kehekehe ‘o e talanoa malie ni.
‘Uluaki; ka mavae mo Sisu, ‘e ‘ikai tetau ‘ilo ‘a ‘etau maumau taimi.
Ko e fefine ni, ko ‘ene ha’u ai pe he ‘aho kotoa ke ‘utu mei he vai ko ‘eni. Pehe pe ‘e ia ko ‘ene fiema’u pe ‘eni; pehe pe ‘e ia ko e nonga pe ‘eni; pehe pe ia ko e fiemalie taha pe ‘eni; pehe pe ‘e ia ko e mo’ui pe ‘eni. Ka na’e talaange ‘e Sisu - ko e vai ko ‘ena te ke inu ai pea te ke toe fieinua pe. Ngata pe he vai ‘e ‘oange ‘e Sisu te ne inu ai pea ‘e ‘ikai te ne toe fieinua.
Kainga, ko e tokolahi atu hotau ni’ihi ‘i
Ka ‘oku ke ‘ilo, ‘oku kei lahi ‘a ho’o fakamole ni koe’uhi pe ko e vai ko ‘ena, ko ho’o kei faingata’ia koe’uhi pe ko e feitu’u ko ‘ena ‘oku ke ma’unga ‘alu ki ai. He ‘ikai ke ma’u e nonga ia hena, he ‘ikai ke ma’u e fiemalie ia hena. Ko e nonga mo e fiemalie ‘e toki ma’u pe ia ‘ia Sisu Kalaisi.
Ko e tokolahi kuo nau ma’unga nofo ki he initaneti ‘o nau inu mei ai, ko e dvd mo e vitio ‘oku lolotonga ‘utu’utu ai e tokolahi ‘o nau pehe ko e nonga ia, kuo afe tokolahi ki he ta misini ‘i muli ‘o ‘utu ai, pehe foki ki he fe’auaki kae’uma’a e kaiha’a. Ka ko ‘eni hotau fekau, ko e vai ko ‘ena te ke toe fieinua pe mei ai, pea he’ikai te ke ‘ilo ‘a ho’o mole mo ho’o maumau taimi kae ‘oua pe kuo ke afe ‘o ‘utu mo inu mei he Vai Mo’ui ko Sisu Kalaisi.
Ua; Ko e tatali he taimi totonu mo e feitu’u totonu.
Na’e ‘osi ‘ilo’i pe ‘e Sisu ia ‘e ha’u e fefine he taimi ko ‘eni, pea ne ha’u ai ‘o talitali ki ai. Na’e ha’u ‘a e fefine ‘o ne fu’u ‘ohovale ‘ene sio mai ko e tangata ‘eni ‘oku talitali atu. Kainga, ko ‘etau mo’ui kuo ‘osi kotofa pe ‘ehe ‘Eiki ha taimi pau ketau fetaulaki ai mo
Kau ngaue faka’evangelio, ‘oua te ke hoha’a kapau ‘oku ‘ikai ke ului ha taha ‘i ho’o malanga, kuo ‘osi ‘i ai ‘e taimi pau ‘a e ‘Otua ma’ae tokotaha kotoa pe. Manatu’i ko e me’a kehe pe foki ia ‘a e ‘ikai ke ului ha taha ia koe’uhi ko e ta’eteuteu ‘eta malanga, ‘oku kovi ‘aupito ia. Kuo pau ketau teuteu pea toutou lotua mo hufia’i ‘etau malanga ki he ‘Eiki koe’uhi ke ne ‘omai ha ola. Pea kapau ‘oku ‘ikai ke nau tali ‘a e ‘Eiki pea ‘oua tetau lotofo’i ai, Ko hota fatongia ke malanga’i pe ‘a e Ongoongo Lelei pea tuku ki he kakai ke nau fai e fili, pe te nau tali pe ‘ikai. Kaekehe pe kuo lava hota fatongia ke talaki ‘ene Fakamo’ui.
Manatu’i ‘a Paula, ko ‘eni pe ‘ene lea, “na’e ‘a’aku ‘a e to, na’e ‘a ‘Apolosi ‘a e fakaviviku; kae ‘a e ‘Otua ai pe ‘a e fakatupu”. Manatu’i kuo ‘osi ‘i ai ‘a e taimi pau ‘a e ‘Otua ma’ae tokotaha kotoa pe. Na’a toki ului ia ‘i ho’o malanga, ka na’e fuoloa pe ha’a ne fanongo ia ‘a’ana ‘i hono talaki ‘o e Ongoongo Lelei, pea toki ului leva ia ‘i ho’o malanga. Pea ko e ni’ihi leva ia te nau fanongo pe ki ho’o malanga, kae ‘ikai ke nau liliu ai kinautolu ia. Te nau liliu kinautolu ia ha taimi kimui ange ‘i ha’a nau fanongo ki ha malanga ia ‘a ha taha kehe. Ka ko hono faingata’a kiate kinautolu ‘oku te’eki liliu, ‘oku ‘ikai tetau ‘ilo pe ‘e hoko fakaku mai e mate, ko ia ‘oku mahu’inga ai ketau tali pe ‘a Sisu he vave taha ‘oua ‘e tolotoloi.
Tolu; Ko e taha he founga malie ‘a Sisu ‘i he talanoa ko ‘eni ko ‘ene talanoa ‘i he me’a totonu pea mo e feitu’u totonu.
Kapau tetau fehu’i ko e ha ‘ene kaveinga talanoa, pea ko e tali ki ai ko e vai. ‘A ia na’e talanoa ‘a Sisu ki he fefine ‘o fekau ‘aki mo e vai ‘i he feitu’u ‘oku ma’u ai e vai, he ko e ve’e vai ‘eni ‘o Sekope ‘oku fai ai ‘ena talanoa. Kau ngaue faka’evangelio, ko e ha e me’a ‘oku ‘ikai ke sai’ia ai mo manako ai e kakai ‘ia Sisu ‘i he ‘etau ngaue, ko hono ‘uhinga he ‘oku ‘ikai ketau fetaulaki pea mo e kakai, pea ko e ‘ikai ketau fetaulaki koe’uhi he ‘oku nau nofo mai kinautolu he me’a ‘e taha ka tau talanoa atu kitautolu he me’a ia ‘e taha.
Nofo mai e kakai ia ‘i he folofola, malanga atu kitautolu ia he fo’i faiva. Nofo mai e kakai ia he Tohitapu malanga atu kitautolu ia he ‘akapulu. Nofo mai e kakai ia he himi malanga atu kitautolu ia he ‘etau folau ki muli. Pea kapau ko e ‘atunga ia, ‘oua tetau ofo ‘i he ‘ikai ke fie ului mai ha taha ‘o tali ‘a Sisu. Ko Sisu, na’a ne ha’u ke talanoa mo e fefine, kaveinga ko e vai, nofo he ve’e vai, malanga ‘aki mo tu’uaki e Vai Mo’ui, pea ha? Kole ‘e he fefine ‘a e vai mo’ui mei he ‘Eiki. Ko kitautolu ia, tau malanga, pea ‘ikai ke kole mai e kakai ia, ka ‘oku ha? Ko kitautolu pe ia ‘oku tau toe kole, ‘a e kau malanga malualoi! he ‘oku ‘i ai ha me’a pehe? Pea tuku pe mu’a kau ngaue ‘evangelio kau lea atu, kuo fu’u lahi ‘eta fa’a kole, ‘ai mo fakasi’isi’i kae ki’i kole mai e kakai. Na’e ha ‘a Sisu, na’a ne malanga’i e vai pea kole ‘a e fefine.
Ko e kau malanga tokolahi, malanga’i ‘a Sisu pea kole motoka, malanga’i ‘a Sisu pea kole pa’anga, Malanga’i ‘a Sisu pea kole tu’unga, ‘oiaue! Ho’o kaakaa, ho’o tepu ‘ia Sisu ke fakaai ho’o manumanu, tuku ia mo e kovi. Malanga’i ‘a Sisu pea tuku ki he kakai ke nau kole mai ‘a Sisu.
Fa; Ko e fakamo’ui ‘a Sisu ‘oku kakato ma’u pe.
‘Oku ke fakatokanga’i e lesoni ‘i he veesi 16, talaange ‘e he ‘Eiki - ‘alu ‘o ui mai ho husepaniti. Manatu’i e talanoa ko e fefine ni na’e nofo mo e kau tangata ‘e tokonima kimu’a, pea ko e fika ono ‘eni ‘oku na lolotonga nofo. Kainga, na’e ‘ikai ke fakamo’ui pe ‘e Sisu ‘a e fefine ni fakalaumalie, ka na’a ne toe hoko atu ‘ene fakamo’ui ki hono famili foki. Na’e ‘ikai ke tokanga pe ‘a Sisu ke ma’u ‘e he fefine ‘a e vai mo’ui pea nofonofo pe ia ‘i he ‘ene angahala, ka na’a ne hoko atu ‘ene ngaue fakalelei ki hono ki’i famili.
Pea ko ia ‘a hotau sipinga, ko ‘etau ngaue fakaului kakai ma’a Sisu ke ‘oua mu’a ‘e ngata pe ‘i he laumalie, ka ke ‘oange foki mo ha tokoni ki hono ki’i famili. Mou manatu ki he fakamatala ‘a e kau ngaue fakamisinale ‘i hotau ki’i fonua ni, ko e taimi na’a nau ‘alu atu ai ki Solomone, Papua pea mo Fisi mo e ngaahi fonua kehe. Ko e taimi na’a nau ngaue ai ‘i ha kolo, ko kinautolu pe ‘oku faifekau, ko kinautolu pe na’e toketa, polisi mo toe faiako foki. ‘A ia ko ‘enau ngaue na’e ‘ikai ke fakangatangata pe he fakaului laumalie ka na’a nau toe tokoni ke langa hake ‘a e tu’unga ‘o ‘enau nofo pea mo ‘enau mo’ui. Ko e ngaue faka’evangelio ia.
Pea ko Sisu ‘eni ‘oku ne toe ‘omai ‘a e sipinga tatau. Fielau e lea ‘a e kolo ki he fefine, kuo ‘ikai ke mau kei tui koe’uhi pe ko ho’o talanoa na’e fai; ka kuo mau fanongo tonu ki ai.’Oku fefe ‘etau ngaue fakalotu, ‘oku tau tokanga pe ki honau laumalie pea ngata ai? Pe ‘oku tau tokanga foki ki he ‘enau mo’ui faka’aho? Ko e lotu ‘oku talamai ‘e Semisi ‘oku ‘alu fakataha pea mo e ngaue, ‘oua ‘e talaange pe ‘oku ou ‘ofa atu mo lotu atu ki ho’o fiekaia, kae lotu pea mo ‘oange foki ha konga ma ke ma’u ‘inasi mei ai. Ko e ngaahi palopalema ‘eni ‘o ‘etau ngaue faka’evangelio ‘oku ‘omai ‘e he talanoa ni.
Ko e veesi 34 ‘uluaki, ko e me’akai. ‘Oku fa’a lahi e taimi ‘oku tau fa’a tokanga ange ai ki he ngaohi me’atokoni pea mo e ma’u me’atokoni, kae si’i si’i e taimi ki he folofola ‘a e ‘Eiki. Kuo fa’a tokolahi ange ‘a e li’aki lotu ko e nofo ‘o teuteu ‘a e me’akai, kae ‘ikai ke nau lava mai ‘o fanongo ki he folofola ‘a e ‘Otua. Veesi 35 ua, ko e lau matangi mo e lau mahina. Fa’a lahi ‘etau tali ke matangi lelei, pea mo ‘etau toloi ngaue pea hoko pe ‘o ‘ikai lava. ‘Oku tau fa’a tatali ke ‘alomalie kae toki fai ha ngaue, pea pehe ‘etau tali ke to ha ‘uha pea toki to ha ngoue, pea ko ‘etau fa’a tatali pehe ‘o hoko ai e ‘ikai ke fa’a lava ha me’a. Tolu, he veesi 35 pe, ‘oku pehe ‘e he folofola ke mou hanga hake. Kainga, vakai na’a kuo fu’u lahi ‘etau hanga hifo mo ‘etau hanga kehe mo e hanganoa kae si’i ‘a ‘etau hanga hake ki he ‘Eiki.
Mou hanga hake ki he ngaahi mo’unga, kainga, ko ‘etau ngaahi faingata’a ‘oku tau fe’ao ma’u pe mo ia, ko e kole ko ‘eni, tau hanga hake ki he ‘Eiki, pea te ne tokoni’i ma’u ai pe kitautolu.
Faleata Leha: 'Oku fakafofonga 'a Faleata Leha ki he Ambassador For Christ 'i Tonga.
| Posted by: admin | Category: Okooko-Tala | Print | Return|