Ko e hala ke foua! Matiu 2:13-23
12/28/07 , by Posted by: admin
Matiu 2:13-23
Me’a ‘e 2 ‘oku ou fakatokanga’i mei he toe lau e lesoni ko eni;
i) ko e hala ‘oku fakahinohino he hili ‘ete a'u kia Sisu
ii) ko Sisu mo e mafai pule
Ko e lesoni ‘o e uike ni ‘oku hangee ‘oku ne faka’imisi ‘i he’etau manatu ‘a e ngaahi talanoa tatau pee ‘i he Tohitapu. Ko e misi ‘a Siosifa ‘o fekau’aki ‘e he ‘angelo ke nau ‘alu ki ‘Isipite, ‘oku kainga mo e fekau ‘o e kau Maki ke nau foki he hala kehe mei he fekau ‘a Helota. Ko e hola ki ‘Isipite ‘oku hange ‘oku langa e manatu ki he ‘Ekisoto ‘a ‘Isileli. Ko e tamate’i ‘o e fanga ki’i valevale ‘oku tau manatu kia Felo ‘i ‘Isipite mo ‘ene fekau ke tamate’i e pepee tangata kotoa!
Ko e ‘aho 6 Sanuali ‘oku fakamanatu ai ‘a e ‘Epifini (Epiphany), ko e faka’ilonga’i ‘o e a’u ‘a e kau Maki ‘o foaki ‘enau me’a’ofa. ‘Oku tala ko kinautolu ‘a e fuofua kau Senitaile ne a’u kia Sisu. Ko e toe kau tuku me’a’ofa ‘e taha ‘a e kau Tauhi Sipi – ko e kakai ma’ulalo pea ‘ikai kau he lau he nofo faka-Siu. Ko e fakamanatu nai 'o e kakai ne 'uhinga ai e hifo 'a e Tamasi'i?
‘Ikai foki e kau Maki kia Helota! Fekau ‘a Siosifa ke tu’u ‘o ‘alu ki ‘Isipite! Ko e me’a ia 'oku hoko he’ete a’u kia Sisu – ko ‘ene fakahinohino e hala ke te fou ai. Pea taimi lahi, ko e hala kehe ‘oku fekaua kita ai. ‘Oku ‘ikai ko ha me’a faingofua ‘a foua e hala ‘oku ‘ikai ke te maheni mo ia! Ka ko e pole ia ‘o e a’u kia Kalaisi. Ko e hiki ke mama'o mei he anga maheni, pea hiki mei he faingofua!
‘Eiki ‘omi pe ‘a e loto
‘O e tu’unga me’a ko ia
‘O ka tuhu mai ‘a langi
Ke te tali fiefia
‘O te hiki ke mama’o
Ki he potu tu’utu’unia
Fekau ‘e Helota ke tamate’i e pepee kotoa si’i hifo he ta’u 2! ‘Oku langa e manatu ki he me’a tatau ne fai ‘e Felo ‘i ‘Isipite!’Uhinga? Ko e ‘ikai te na loto ke toe fakauoua’i hona mafai. Ke ‘oua toe ‘i ai ha taha ngali ‘e hoko ‘o ui ko e pule, taki, tu’i ke vahevahe hona taloni!
Ne hoko pee ‘a Sisu ko e manavahee’anga ‘o e ngaahi mafai talu mei he’ene valevale. Ne a'u ki he kolosi ko ‘ene fakauoua’i e mafai pule ‘o e taimi ko ia. Pea vakai ki he me’a ‘oku fai ‘e mamani hono fehu’ia mo hono fakauoua’i ‘e Sisu honau mafai? Ko e fekau ke tamate’i mo faka’auha? Ko e lomekina mo fakaaoao'i?
‘Oku ‘i ai nai ha fekau mahu’inga ‘oku tonu ke fai ha sio ki ai mei he tapa kotoa ‘o e sosaieti? Ha e tali ‘a e Pule’anga ki he fehu’ia honau mafai? Ha e tali ‘a e Siasi ki he fehu’ia ‘o hono mafai? Ha ‘eku tali ki he fie pule ‘a Sisu ki he ngaahi taloni ‘o ‘eku ngaue, ‘o ‘eku tauhi famili, ‘o ‘eku ako, ‘o ‘eku pa’anga, ‘o ‘eku me’a kotoa?
Ta’u fonu mo femou’ekina kiate au e 2007. Ka ‘oku ‘amanaki ki ha ta’u 2008 mo e hala ‘oku fekau au ki ai. Ko e pole ia ‘o e muimui kia Kalaisi ko ‘ene taloni ‘i he mo’ui pea ‘e ‘alo’i e Tamasi’i ‘Otua ‘i he taloni ‘eku mo’ui ‘o ka ‘ai’angakai hoku loto!
Tauange ke hoko e ta’u 2008 ke mo’oni e lau ‘ae punake: “ko e me’atepuu e ke tau tukupaa, ke mateaki’i ‘ae Hau Tapuha”.
| Posted by: admin | Category: okooko | Print | Return|