"Taupo'ou"; ko e palopalema?

12/17/07 , by Posted by: admin

"Pea na'e fai 'eni kotoa pe, ko e 'uhi ke fakamo'oni ki he me'a ne folofola'aki 'e he 'Eiki 'i he Palofita"

'Oku 'i ai 'a e palopalema fekau'aki moe (mohenga totonu) 'o e konga ko eni 'oku ngaue'aki 'e Matiu, 'a hangee 'oku meimei ma'u hala nai, pe ngaue hala'aki 'e Matiu e konga ko eni mei a 'Aisea  ('Aisea 7:14). (Mathew quoted out of context). Pe ko e taha eni e ngaahi 'uhinga 'oku fifili'i ai e kau fakama'opo'opo Tohitapu! (canonized of the Bible)

Ko 'Isileli 'oku vaeua he taimi ko eni ('Aisea 7); Isileli mo Siuta. 'Oku lolotonga 'i ai e mafai muli 'oku 'i 'Isileli (ko Silia 'apee), pea hanga mai 'a 'Isileli 'o 'ohofi 'a Selusalema, ko e kolomu'a 'o Siuta. Neongo na'e 'ikai too 'a Selusalema, ka ne hoko eni ke nofo tailiili ai 'a e Tu'i Siuta - Ahasi, mo hono kakai. Ne fekau ai 'a 'Aisea ke 'alu kia Ahasi, pea koe fetalano'aki ko eni ('a Ahasi mo 'Aisea) 'oku ha'u mei ai 'a e konga 'oku ngaue'aki 'e Matiu (Matiu 1:23). 'A ia ko e 'uhinga ia 'a Matiu, ko e lau/hiki 'a e Palofita.

Ko e "faka'ilonga", ka 'oku 'ikai ko e "palofisai"?

Ko e fekau eni ke kole ha faka'ilonga. Ha faka'ilonga ke fakamo'oni'aki 'a e ongoongo ko ia ke "nofo nonga" pe ia 'oua 'e hoha'a ki he ongo "ngau'aafi kohu na" ('Aisea 7:10). Pea tala leva koe faka'ilonga eni (v.14 'o 'Aisea - vakai 'e feitama 'a e taupo'ou pea te ne fa'ele'i ha tama pea te ne fakahingoa ko 'Imanuela ...). Ko e konga eni 'oku hiki 'e Matiu. Ka 'oku hiki 'e Matiu 'o hangee 'oku ne 'omai 'e ia ke pehee ko 'palofisai' 'e 'Aisea 'a e 'alo'i 'o Sisu. Ko e palopalema ia.

Ko e palopalema, he 'oku tala 'e Matiu ia ko e tuhu kia Sisu, ka ko e mohenga totonu ia 'o e konga ko eni ko e faka'ilonga ia kia Tu'i Ahasi he'ene nofo teteki ki he ongo Tu'i ko ee ('Isileli & Silia). 'Oku mahino eni mei he hoko atu e lau 'o e vahe 7 'o 'Aisea 'o 'ikai ngata pee 'i he vesi 14, ka e vakai kihe veesi 16 - ".. he te'eki ke poto 'a e tamasi'i ke teke'i 'a e kovi mo fili 'a e lelei, kuo li'aki 'a e kelekele ko ee, 'a ia 'oku ke mate teki ki hono ongo tu'i".

'A ia 'oku mahino mai, ko e 'Imanuela 'oku 'uhinga ki ai 'a 'Asea 7:14 ia, 'oku hoko mai pe ia 'i he taimi ko ia - he kuo pau ke too 'a 'Isileli ia (li'aki e kelekele 'a ia 'oku ke teki ki hono ongo tu'i), kimu'a ke poto e tamasi'i he 'ilo e lelei mo e kovi - pe ko hono 'ai mahino, he kei ta'u 2 pe 3 nai, pe 'i he lotu Siu hono ta'u 14!

Koe palopalema leva 'o e hiki 'a Matiu ko e 'ikai ke fenapasi 'a e 'uhinga 'o e konga tohi ni ('Aisea 7:14), pea mo e 'Alo'i 'o Sisu (Matiu 1:23), he na'e 'uhinga 'a 'Aisea 7:14 ia ki he faka'ilonga kia Tu'i Ahasi, ka 'oku 'ikai ko hano palofisai'i 'o Sisu ta'u 700~ ki he kaha'u ('o hangee ko ia 'oku hanga 'e Matiu 'o ngaue'aki)

'Oku fehu'ia leva ai 'a e "taupo'ou" 'i hono ngaue'aki kia Mele. He kapau ne ngaue hala 'aki 'e Matiu e konga ko eni mei a 'Aisea, pea faka'ilongaua leva pe na'e "taupo'ou" 'a Mele. He ko e "taupo'ou" 'ou 'uhinga ki ai 'a 'Aisea 'i he me'a kehe, ka e hiki 'ia Matiu pea hangee kuo tau pehee ai pee ko e 'uhinga ki a Mele. Pea 'i he'ene pehee, 'oku ngali tama 'oku fakama'u e ngaahi tokateline lahi ki he fu'u pou tau'omo'omo. He kapau 'oku 'ikai taupo'ou 'a Mele, pea ta na'e tamai ki mamani pee 'a Sisu (his divinity isn't what we have made it
up to be), pea ne anga fefee ha'ane mo'ui ta'emele mo ta'ehia? ... pea mo e haafua e ngaahi afo fakatokateline 'oku piki ki he " .... tu'itu'ia mei he Laumalie Ma'oni'oni ...".

| Posted by: admin | Category: Okooko-Tala | Print | Return|

Add A Comment

• March 5, 2008, 2:04 am - Faleata Leha

  Tukukehe ange pe 'a 'Aisea pea mo Matiu, kapau te ke to'o leva 'a e 'Otua 'a Sisu koe'uhi ko ho'o pehe na'e tamai pe ki mamani, pea 'oku ou talaatu, tuku aa 'etau lotu katau foki 'o fai ha me'a 'e taha 'oku 'aonga.

  'Oku ou fokotuu atu, ko e ha e kaveinga 'etau malanga, kapau pe 'oku 'ikai ko e fakamo'ui 'a Sisu, pea tuku. Pea kataki mu'a 'o fakapapau'i ange 'oku ke tui ki he Tohitapu ko e tohi mei he 'Otua, na'e fakamanava'i kakato ia 'e he 'Otua.