Temipale Nuku'alofa Tonga 'o e Siasi 'o Sisu Kalaisi o e Kau Ma'oni'oni 'o e Ngaahi-'aho-kimui ni
11/13/07 , by Posted by: Admin
Neongo na'e 'i ai pe 'a e Temipale 'o e Siasi na'e 'osi langa 'i Tonga ni, ka na'e toe langa fo'ou pe ‘e he Siasi 'a e Temipale. Na'e maau pe langa pea faka'ataa ki he kakai 'o e fonua ke nau lava atu ki loto 'o mamata ki he faka'ofo'ofa 'o e temipale kimu'a ia pea toki huufi mo fakatapui.
Ne lele ‘a e ngaahi polokalama mei he 'aho Tokonaki 29, Sepitema- ki he Tokonaki 20, 'Okatopa, ‘a ia ne kamata ‘aki ‘a e ngaahi faka’ali’ali faiva mei Polinisia ‘a e fanau to’utupu ‘o e Siasi ne fakahoko ‘i he Pa’ake Teufaiva.
Fakatatau ki he fakamatala 'oku ha 'i he 'enau polokalama Open House. Ko e ngaahi Temipale ni 'oku makehe ia mei he ngaahi falelotu angamaheni 'e lauiafe 'o e Siasi 'oku mafola 'i he funga 'o mamani. ‘Oku nau makehe 'i honau taumu'a mo honau faka'aonga'i mei ha toe falelotu pe. 'Oku 'ikai ko honau lalahi pe faka'ofo'ofa 'oku nau makehe ai. Ka ko e ngaahi nague 'oku fakahoko 'i loto.
'Oku 'ikai ko ha me'a fo'ou hono vahe'i 'o e ngaahi Temipale pehe ni 'o e Siasi ki he ngaahi ouau mahu'inga, 'o hange ko hono to e fakafaikehekehe'i mei he toenga 'o e ngaahi feitu'u fai'anga lotu. Ko ha me'a 'eni ia na'e fai he kuonga mu'a 'i 'Isileli, 'a ia na'e fa'a lotu ai 'a e kakai 'i he ngaahi fale-lotu. Ka ko e 'uluaki feitu'u na'e toputapu ange kiate kinautolu, ko e fale fehikitaki 'i he toafa 'a ia na'e 'i ai 'a e potu ko e potu Ma'oni'oni 'o e Ma'oni'oni, pea hoko atu ai mo ha ngaahi Temipale.
'Oku pehe pe mo e 'aho ni. Ki mu'a pea fakatapui 'a e Temipale ne fakaafe'i 'ehe Siasi 'a e kakai kotoa ke nau mamata'i 'a e loto fale mo hono naunau. Ka 'i he taimi 'oku fakatapui ai 'oku hoko leva ia ko e fale 'o e 'Eiki mo tuku ki ai ha ngaahi natula 'oku toputapu pea ko e kau memipa pe 'o e Siasi 'e ngofua ke nau hu ki ai. 'Oku 'ikai foki ke 'i ai ha me'a 'oku fakapulipuli ai. Ka 'oku toputapu.
'Oku tui foki 'a e Palesiteni fakatemipale 'o Tonga ni Faivaola (Eric Shumway), ko e tapuaki 'eni ki he fonua fakalukufua he neongo ko e Temipale ko e langa ma'a e Siasi 'o Sisu Kalaisi 'o e Kau Ma'oni'oni 'o e Ngaahi 'Aho ki Mui ni, ka ko e Temipale ia ma'a e kakai 'o Tonga ni pea mo e fonua foki.
Ka kuo maau eni hono fakatapui pea kuo kamata ngaue'aki 'ehe Siasi ki he 'enau ngaahi ouau fakalotu.
Losi ‘Alofi
| Posted by: Admin | Category: church | Print | Return|