Ta’ofi Tohitapu ‘e Siaina Sipoti ‘Olimipiki 2008.

11/08/07 , by Posted by: Admin

Kuo fakahaa ‘e he Pule’anga Siana ‘e ‘ikai ngofua ke to’o ha Tohitapu ki he nofo’anga sipoti ‘o e ‘Olimipiki ‘i hono fai ange 'o e fe'auhi sipoti ki ai ‘i he ta’u fo’ou. Ko e ‘uhinga ‘oku pehee; ke faingofua ange ‘a e ngaue ki hono malu’i mo tokanga’i ‘o e fe’auhi sipoti.

‘Oku ‘osi tuku mai ‘a e ngaahi me’a kuo loto e Potungaue Malu’i ‘a Siaina ke tapui mei he sipoti, pea ‘oku kau ai e Tohitapu. Ka ‘oku ngofua pee ki he kau folau ‘eva ki he fonua, ke to’o ha’ete Tohitapu, ka e ‘ikai toe laka hake he Tohitapu ‘e 2.

‘Oku kamata e talanoa’i ‘o e me’a ni ‘i he ngaahi kautaha lotu he ‘oku tala mei Siaina, ‘e ‘ikai ngofua ha fa’ahinga faka’ilonga faka-lotu pe, ‘i he nofo’anga ‘o e sipoti ‘Olimipiki.

Ko e toki kamata mai pe eni ke ngofua e huu ‘a e 'lotu' ki he fonua ni he ngaahi ta'u si'i kuo tau situ'a mei ai. Ka na’e tapui ke huu ha lotu ki Siaina ‘i he taimi ‘o e kei fakamalohi’i e pule faka-Kominiusi, a’u mai ki he kamata ‘o e miliniume fo'ou.

Fakatatau ki he lau ‘a e ngaahi kautaha lotu faka-kalisitiane ‘oku nau fai lahi e ngaue faka-‘evangelioo ki he ngaahi fonua ‘oku ‘ikai ‘ataa ai e lotu faka-kalisitiane; hangee ko e Open Doors Ministry (http://sb.od.org/) - ‘oku mahino heni ‘a e kei faingata’a’ia ‘a e lotu ‘i Siaina he ‘oku te’eki ke tali lelei mo fai tau’atina ‘a e lotu ‘i he fonua ni, neongo 'a e pehee kuo 'ataa 'a e fonua 'o hangee ko e ngaahi fonua lalahi 'o mamani.

‘Oku ‘i ai ma’u pee ‘a e kau fakafofonga ‘o Tonga ki he Sipoti ‘Olimipiki. Ko Siaina foki ‘oku hanga ‘a Tonga ki ai ke fakamalohi’i mo faka’aia’ai hona vaa faka-tipilometika, pea mo hanga ‘a Tonga ki ai ki ha ngaahi tokoni ‘i he langa faka-lakalakalaka ‘o e ‘ekonomika. Hangee ko e noo ne fai 'e he Pule'anga Tonga ('i he ngaahi mahina kuo hili), mei Siaina 'o fakataumu'a ke ngaue'aki 'a e pa'anga ko ia ki hono langa 'o Nuku'alofa hili 'a e fakatamaki ne hoko 'i Novema, 2006.

| Posted by: Admin | Category: church | Print | Return|

Add A Comment

• November 21, 2007, 10:05 am - Tule Misa

  Malo mu'a e ma'u ongoongo 'oku ou sio au ki he mahu'inga ke 'oua e to'o pe tohitapu. Koe me'a e 'oku mahu'inga ai hono ako ma'u loto e folofola he kapau 'oku 'ikai 'iai e tohitapu ka kuo tongi ia he loto moe 'atamai e kalisitiane ke tala mo fakamatala ki he kakai 'oku 'ikai kenau 'ilo ki ai. 'Oku mahu'inga foki ke tau mohu founga hono leleaki'i e kosipeli fakamo'ui ki ha feitu'u pe pea mo ha taha pe.