Feohi'anga 'o e To'utupu mo e Tu'itapu: (World Youth Day Sydney, 2008)
11/08/07 , by Posted by: Admin
‘Oku 'amanaki ke fakahoko ki Sene 'Aositelelia ‘i Siulai, 2008 ha fakafeohi 'a e To'utupu 'o e Siasi Katolika 'o mamani pea 'oku kau atu ki ai 'a e to'utupu 'o e Siasi Katolika 'o Tonga ni. Ko e fakatahataha lahi taha eni ‘a e To’utupu Katolika he ‘oku fakafuofua ki he to’utupu ofi ki he miliona ‘e fakatefua ki Sene ki he katoanga ni.
“Kuo a'u 'eni ki he toko 750 kuo lesisita mai mei he ngaahi To'utupu 'o e Siasi 'o tatau pe 'a Tongatapu ,'Eua,Vava'u Ha'apai mo e ongo Niua foki”. Ko e fakamatala ia ‘a Latu Patolo – ko e ‘Ofisa Fetu’utaki, mei he 'ulu'i 'ofisi 'o e Siasi Katolika 'i Toutaimana.
Ko e taumu'a foki 'a e feohi'anga ni ko hono “fakahoko 'a e fekau na'e tuku mai mei he Tu'itapu kuo mama’o- Soane Paulo II- pea pehe ki he 'ene foaki mai mo e me'a 'ofa 'a ia ko e 'imisi 'o e Koluse pea pehe ki he 'imisi 'o Malia”.
“Ko e koluse 'oku ne fakamanatu mai kia kitautolu 'a e Pekia ma'ongo'onga na'e fai 'e Sesu 'i he funga kolose ko e 'uhi pe ko koe mo au pea lava ai ke ma'a 'etau angahala. Ko e 'imisi 'o Malia ko e fakamanatu mai 'a e fa'ee 'a Sesu ko Malia pea ko e fakakaukau ke 'ave pe kena 'alu holo fakataha pe foki - 'a Malia ko e fa'ee, pea mo 'ene tama ko Sesu. Ko e fekau mahu'inga 'oku tuku mai mo e Kolose ki he to'utupu mei he Tu'itapu. KE TALAKAI KI MAMANI 'A E NGAUE FAKAMO'UI 'A E 'EIKI NA'E FEKAU MAI AI IA. Pea 'oku kau foki hono 'ave takai 'a e koluse 'i mamani he konga ia hono fakahoko e fekau kuo tuku mai”, ko Latu Patolo ia.
'I Tonga ni 'oku 'i ai ma'u pe 'a e kaveinga fakamahina 'oku tuku mai ki he ngaahi to'utupu ke nau hufia, ko e konga ia 'o 'enau ngaahi teuteu atu ki he katoanga ko 'eni 'oku 'amanaki ke fakahoko ki Sene 'Aositelelia 'i he ta’u kaha’u.
Fakatatau ki he fakamatala 'a Latu, ko e fekau ko 'eni 'e lava hono ta'u 1 ki Siulai 'o e ta'u kaha'u pea ko e 'uhinga ia 'oku fakahoko ai 'a e fakakaukau ko 'eni ke faka'osi pea tapuni 'aki 'a e ngaue ko 'eni 'aki ha fakafeohi 'a e to'utupu pea mo e 'Epikopo Penitiketo ki 'Aositelelia. 'Oku lolotonga'i 'Aositelelia 'a e 'imisi 'o e koluse he lolotonga ni.
'Oku hoko 'a e fakakaukau ni kene to e hanga 'o fakamalohi'i 'a e to'utupu Katolika ke to e malohiange 'a 'enau tui moe pipiki ki he Siasi pea 'ikai ngata ai, ka 'oku hanga 'e he fakakaukau ko 'eni 'o faka'ai'ai 'a e to'utupu ke nau ongo'i 'oku 'i ai honau mahu'inga 'i he Siasi.
'I he faka'amu mo e fokotu'utu'u fakalukufua 'a e Siasi 'oku nau faka'amu pe ko e 'enau taumu'a ki he fakafeohi ko 'eni ke 'oua na'a hoko eni ko 'alu 'eva, pe ha toe 'uihnga kehe, ka ko 'enau faka’amu ke foki mai ‘a kinautolu ‘e kau atu ki he feohi’anga ni 'oku nau to'oto'o mai ha fa'ahinga fakakaukau 'e tokoni ki he langa hake 'a e mo'ui fakalaumalie pea mo tokoni ki hono langa 'o e ngaahi siasi 'oku nau kau ki ai 'i Tonga ni.
Ko e Fehoi’anga ‘a e To’utupu Katolika (World Youth Day) fakamuimui ne fai ki Cologne, Siamane ‘i he 2005. ‘Oku fakahoko 'a e ngaahi polokaama ‘i he fai’anga 'o e Sipoti ‘Olimipiki ne fakahoko he ta’u 2000 'i Sene.
Kau he ngaahi taumu’aa 'a e mahu'inga ke pukepuke ‘a e To’utupu Katolika pea mo fakamamafa’i ai pee ‘a e ngaahi tokateline faka-kalisitiane ki he To’utupu. ‘Oku fakahisitolia he ‘e ‘i ai ‘a e Tu’itapu, Benedict XVI, pea ‘e lele ‘aho 6. Ko e toki tu’o 4 ‘aki pe eni ha ‘a’ahi ‘a ha Tu’itapu ki ‘Aositelelia 'i he hisitolia 'o e fonua ni.
Ko e ouau misa tapu ‘e faka’osi ‘aki pea ‘oku fakafuofua ‘e he kau fokotu’utu’u polokalama ‘e tokolahi ange ‘a e kau pilikimi ki Sene ki he feohi’anga ni ‘i he kakai ne oo ki he Sipoti ‘Olimipiki, 2000.
by Losi 'Alofi
| Posted by: Admin | Category: church | Print | Return|