Ngaue 1:1-11
05/18/07 , by Posted by: Admin
Uike ni 'oku fakamamafa 'a e ngaahi Siasi ki he ha'ele hake ai 'a Sisu hili 'ene toetu'u mei he pekia. Ko e haa 'a Sisu 'ia Luke (24:44-53), 'oku fakafehokotaki ki he lesoni 'o e uike ni, pea ko e mohenga ia 'oku tonu ke te fakatokanga'i 'i he teuteu 'o e uike ni. 'Oku fakatoka mai 'i he mohenga ni 'a e "'alu" pea mo e palomesi 'o e toe "foki" mai - 'oku hanga 'e he talanoa he lesoni 'o e uike ni 'o langa'i mai 'a e nofo'anga 'o e 'Otua 'i 'hevani', pea mo e nofo'anga 'o e Siasi 'i mamani - ko e fa'ahinga 'imisi fakasiokalafi 'oku ne fakamanatu 'a e 'Otua 'oku 'afio 'i hevani pea mo mamani; 'oku pule 'i hevani pea pule 'i mamani. Ko e mohenga ia 'o e lesoni 'o e uike ni, pea fai hano toki fakafonufonu mei ai. Ko e fakafonufonu leva 'oku kau ai e fanga ki'i me'a ko eni, tautefito ki he ngaue 'a Siasi;
- koe fakahinohino ke tali 'ia Luke 24:49, 'oku ongo mo ia 'ia Ngaue 1:4. 'Oku talamai ko e Siasi ke 'tali', ke tali ke toki fekau'i mei he Tamai. Ko 'ene ngaahi ngaue ko e ngaue 'i he fekau 'a e Tamai
- ko e tali ke ma'u 'a e "me'a'ofa 'o e ivi". Luke ko e tali ki he 'malohi mei 'olunga', pea Tohi Ngaue, 'te mou ma'u pee ha malohi'. 'Oku 'ikai lava e ngaue 'a e Siasi 'iate ia pee - 'oku toki malava 'i he malohi mei 'olunga, (fakatokanga'i ko e me'a'ofa)
- ko e ivi malohi 'oku fai e tali ki ai 'a e Siasi ke ma'uu, ke hoko ko e "fakamo'oni". 'Oku 'i ai 'a e taimi tatali, pea ko e tatali ki he ivi, ko e ma'u e ivi ko ia ke hoko ko e fakamo'oni! Mei a Ngaue 'oku ne 'omai e anga 'o e tuku atu 'ete fakamo'oni (Selusalema, Siutea, Samelia .. pea mo mamani kotoa), pea 'oku 'omai leva 'e Luke (v. 46 & 47) 'a e kakano 'o e me'a ke fakamo'oni ki ai - kalusefai, pekia, pea toetu'u 'a Sisu. Ko e me'a ko eni na'e hoko, 'oku langa ai 'a e fakatomala pea ma'u mo e fakamolemole!
Mei he ngata'anga 'o 'ene hiki kosipeli 'oku feinga 'a Luke ke toe fakamanatu 'a e mahu'inga ki he Siasi 'a e taimi tatali. 'Oku to e hoko atu ai pee 'ene fakamamafa'i eni 'i he'ene kamata 'o e Tohi Ngaue. 'Oku 'ikai lava e Siasi ha'a ne ngaue 'o mama'o mei he ivi mei 'olunga, pea 'oku fakamanatu mo talamai 'a e mahu'inga 'o e taimi ke fai ai ha fakatatali. Ko e haa 'etau vakai ki he anga 'etau ngaue 'i he ngaahi 'aho ni?
Okooko na'a tokoni ki he lau Folofola
| Posted by: Admin | Category: okooko | Print | Return|