Ngaue 16:9-15
05/08/07 , by Posted by: Admin
Tohi Ngaue 16:9-15
Ko e talanoa eni ki he tala 'e ha visone 'a e feitu'u ke hoko ki ai e ngaue! Nofo 'a Paula, ko e 'apositolo tu'ukimu'a tali ki he feitu'u ke hoko e ngaue ki ai. Vakai atu ki hee, 'ikai, vakai atu ki hee, 'ikai. Toki tala 'e ha visone 'a e hoko ki Masitonia. Me'a malie ia ke tau ako mei ai - 'a e faka'ataa kitautolu mei he ngaahi ha'i 'o e fai angamaheni, 'o e fai 'o ha ngaue ko 'ene ofi mo faingofua, 'a e fai he koe tukufakaholo! Taimi 'e ni'ihi 'oku lelei ke te nofo 'ataa hangee ha ki'i maloloo 'o mahu'inga ke vakai pe ko e fee feitu'u 'oku kouna ke hoko ki ai. 'Oua te te hoha'aa kapau 'oku ngali 'oku 'ikai fai ha me'a!
Uike kuo 'osi ne fakamanatu ai 'a e 'fekau fo'ou' 'o e fe'ofa'aki. Uike ni 'oku 'ikai talamai ko e tali 'a Paula ki ha kakano 'o ha me'a ke ne malanga'aki; 'ikai ko e tali ki ha visone 'o fekau'aki mo e fekau ke 'ave! Ko e tali mo e fakaongo 'a Paula ia ki he feitu'u. Pea 'ikai talamai ia pee ko e haa e me'a ne malanga'aki 'e Paula - 'oku tau 'ilo mei he'ene 'Ipiseli, pea mei he ngaahi konga kehe 'o e Tohi Ngaue 'a e ngaahi kakano 'o 'ene malanga. Ka ko e 'alu ko eni ki Masitonia, 'oku talamai pee ne fanongo 'a Litia pea tangaki 'e he 'Eiki hono loto. Taimi 'e ni'ihi 'oku fekau'i pe kita ke te 'alu ki he feitu'u neongo 'oku 'ikai mahino pee ko e haa e fekau ke te 'alu mo ia.
Ko e fakaongo 'oku 'ave ai kitautolu 'e he 'Eiki; ki he feitu'u 'oku ne 'osi teuteu - 'feitu'u 'oku fai ai e lotu'; pea ki he kakai kuo ne teuteu - 'kau fefine kuo fakataha ki ai'. Ko e tokonaki ia 'oku fai 'e he 'Eiki ma'a kinautolu 'oku fakaongo ki ai! Tooatu ka ako mei ai e Siasi pea mo 'ene ngaue faka-'evangelioo.
'Oku talamai 'a e fefine ko Litia ne tangaki 'e he 'Eiki hono loto ke tokanga ki he ngaahi me'a ne malanga'aki 'e Paula. Pea mei ai ne papitaiso, pea ne ne fakaafe'i mo puketu'u 'a e kau tama ni. 'Oku lava ke tau sio ki ha ngaahi me'a mei a Litia; 'ataa hono loto 'ikai ke femou'ekina; hoko hono papitasio ko 'ene tukulolo ia ke hoko ko e taha he fanau 'a e 'Otua pea 'ikai toe fakaongo mo popula ki he ngaahi ha'i 'a mamani; 'oku ngaue 'a e 'fekau fo'ou' 'o e fe'ofa'aki - ne ne fakaafe'i kinautolu ke 'ikai ngata pee ha'anau ha'u ki hono fale, ka kenau nofo ai.
Ngaahi me'a ko e fakalotolahi;
- faka'ataa 'etau fakakaukau, 'etau mo'ui 'oua 'e popula ki he ngaahi 'aavahevahe fakateolosia, fakatokateline mo e haafua. Ko 'ene tau'ataina hotau ngaahi loto mo 'etau mo'ui pea 'oku hifo mai 'a e maama 'o e ongoongo lelei 'a Sisu toetu'u ke ne fakaa'ua'u hotau toonounou.
- tukulolo ki he 'Otua ('imisi 'o e papitaiso), pea ko e tau'ataina ia mei he ngaahi mafai fakamamani.
- pea 'oku fakafonu kita 'e he fu'u ivi 'o e fekau ke fe'ofa'aki (fakaafe'i 'o e kau 'aunofo: Loma 12:13)
Okooko na'a tokoni ki he lau Folofola
| Posted by: Admin | Category: okooko | Print | Return|