Ngaue 11:1-18
05/03/07 , by Posted by: admin
Ko e talanoa'i eni 'o e 'a'avea mo e visone, pea 'oku ne 'omai 'a e 'imisi 'o e ope - 'o e fotunga 'o ha me'a 'oku teetee 'i he'ete fakakaukau. Ko ha me'a 'oku ope atu mei he angamaheni - ko e 'aavea & visone!
Ko e fokotu'u fakakaukau 'oku tu'unga 'i he hoko 'a e a'usia fo'ou 'i he visone ('a Pita), ke ne fakahoko ha liliu 'o e nofo'anga motu'a ki he fo'ou - fakafo'ou. 'E lelei ke lau 'a (Levitiko 11 & Teutalonome 14), ke fakamohenga 'a e visone 'a Pita 'o fekau'aki mo e "ma'a" moe "ta'ema'a". Hangee eni hano fakaafe'i' kitautolu ke tau vakai ki he 'aho ni mo e anga 'etau faka-kalasi 'a e fakatapui mo e me'a 'oku 'ikai tapui - 'a e ma'a moe ta'e-ma'a.
'Oku hanga 'e he visone (ko e a'usia 'i ha mamani 'oku kehe), 'o fakaa'u mai 'a e ngaue fakafo'ou 'a e 'Otua, pea 'oku ongo mai heni 'a e fekau 'oku 'i he Kosipeli 'o e uike ni - Sione 13 - " .... 'a e fekau fo'ou ...".
Ko e me'a ne sio ki ai 'a Pita 'i he'ene visone 'oku hoko ko e le'o ke ne fekaua 'a Pita ke feohi mo e kakai na'e tala 'e he tukufakaholo ko e kakai 'oku 'ikai tonu mo taau mo e Pule'anga 'o e 'Otua - Senitaile. Me'a malie ko 'etau lau 'a e talanoa ni pea hangee 'oku fofoa mai ai 'a e fa'ahinga 'ulungaanga 'o e ngaue 'a e 'Otua 'oku tonu ke tau muimui ki ai. Ko e holoki 'a e ngahai 'aa vahevahe ne langa nai mei he ha'i 'o e tukufakaholo.
'Oku hoko atu leva 'a e ngaue 'a Laumalie hili 'a e visone. Ko e fakaafe'i mo e fekau'i atu ki he 'api 'o kinautolu 'oku 'ikai tatau mo "kitautolu". Fakatokanga'i 'oku 'i ai 'a e 'nautolu' & 'kitautolu'. 'Oku hanga 'e he visone 'o 'omai; i) 'a e 'uhinga fo'ou 'o e "ma'a" ii) ngaue mai 'a e Laumalie 'oku 'ikai ha faikehekehe iii) 'oku 'omai 'e he 'angelo ha fekau fakamo'ui.
Ko e fakaafe 'oku tefito ai ha malanga ko e fakakaukau 'o e pole 'oku tonu ke to'oto'o 'e he taha 'oku muimui kia Kalaisi. Ko 'ene holoki 'a e ngaahi ha'i 'oku ne fakamavahe'i 'aki 'a e kakai. Ko e 'uhinga ia 'oku ngali fakato'oto'o ai 'a e konga lesoni ko eni, ko e feinga ke tupe'i 'a e me'a 'oku femou'ekina e ngaahi Siasi ni'ihi ki ai; ko e langa e faikehekehe'anga! Ko e tali 'o e ofongi mai 'o e holoki e ngaahi faikehekehe'anga 'oku ha'u fakataha mo e pole, mo e faingamalie ke tau puke. Ko e faingamalie ia 'oku ongo mai 'i he fekau fo'ou 'o e Kosipeli - Sione 13:34&35 - ko e faingamalie ke tuku e kehekehe ka tau "fe'ofa'aki".
Okooko na'a 'aonga ki he lau Tohitapu.
| Posted by: admin | Category: okooko | Print | Return|