Sione 13:31-38
04/30/07 , by Posted by: Admin
Ko e konga ‘e taha ‘oku kehe ai ‘a e Kosipeli ‘a Sione mei he toenga ‘o e ngaahi Kosiplei (ngaahi kosipeli “sio fakataha”), ko e lahi ange ‘a e hiki ‘e Sione ‘a e talanoa mo e fe’iloaki ‘a Sisu mo e kakai tautautokotaha. Ko e ngaahi kosipeli ko ee ‘oku lahi ‘aupito ‘a ‘enau tokanga ki he ngaahi akonaki mo e ngaahi lea faiako, mo e ngaahi malanga ‘a Sisu ki he faka-tokolahi. Pea koe konga lesoni ko eni ko e taha ‘o e ki’i taimi ‘o Sisu mo ‘ene kau Akonga fakaekinautolu pee. ‘Oku nau kai ‘i he ‘Ohomohe faka’osi, pea hili eni hono fakahaa ‘e Sisu ko Siutasi te ne lavaki’i ia. Kuo tu’u ‘a Siutasi ‘o ‘alu ka ko Sisu pe eni mo e toenga.
Lahi e ngaahi me’a ‘oku hoko ‘i he taimi ko eni, ko e taimi femou’ekina ‘o e ta’u ‘i he mo’ui ‘a e kakai Siu – ko e taimi ‘o e Pasova pea fakaholo mai ki Selusalema ‘a e Siu kotoa. Ne ‘osi fai pee ‘e Sisu ‘ene ngaahi talanoa mo e ‘ene feinga ke faka’ali ki he’ene kau Akonga ‘oku vave mai ‘a hono puke ia ‘o tamate’i pea iku ai ke mate. Ka ne ‘ikai mahino eni ki he kau Akonga.
To e fai ‘e Sisu ‘ene talanoa fakalika ‘a e teu ‘ene pekia pea mo e ngaahi talatalaifale faka’osi’osi – “ko e feitu’u ‘oku ‘amanaki keu ‘alu ki ai he’ikai te mou lava ke a’u ki ai”. Te’eki pee ke mahino, ‘uhinga ai e toe fie’ilo ‘a Pita – ‘Eiki ko ho’o me’a ki fe?
Ko e tali ‘a Sisu ki he fie’ilo ‘a Pita – he’ikai te ke lava ‘o muimui ki ai he taimi ni! Ka te ke muimui ki ai ‘a mui. Me’a ‘oku ‘asi mai;
- ko e ‘uhinga eni ‘a Sisu ki he teu puke ia ‘o ‘ave ‘o fakamaau’i pea mo e ngaahi fakamamahi kehe ne hilifaki ki ai. Ne ha’i, taa, ‘aka, ‘anuhia, valokia, pea fekau kene fata e ‘akau ne ngaohi ‘aki hono kolosi ki tu’a Selusalema, pea faka’osi ko hono tuki e fa’o hono ongo nima mo hono va’ee ‘o tautau. Pea taatuku ‘aki hono hoka tao’i ke mahino kuo mate! “Pita, he’ikai te ke lava ‘o muimui mai ki ai he taimi ni”
- “ka te ke muimui ki ai ‘a mui” – hangee nai eni ha tala fakapalofisai ‘a Sisu ki he iku’anga (mate’anga ‘o e kau Akonga). Tukukehe pee ‘a Sione ko e toenga, ne nau mate fakama’ata! ‘oku ngalingali ko e ‘uhinga ia ne too ai e lea mei he kolosi kia Sione – Tama ko ‘ena ho’o fa’ee, fa’ee ko ‘ena ho’o tama. Ngalingali ko e ‘uhinga ia ne ‘ikai mate taamate’i ai ‘a Sione ko e tuku mai ke ne tokanga’i ‘a e “fa’ee”.
Taa ko e muimui fakatisaipale ‘oku ‘i ai hono ngaahi faingata’a mo hono ngaahi mamahi kuo pau ke foua.
Me’a ‘e taha mei he lesoni, ‘a e akonaki manakoa mo ’ilo’i ‘a Sisu ‘i he veesi 34 & 35 – mo u “fe’ofa’aki”. Kapau te tau fakatokanga’i ‘a e hangee ‘oku tokanga makehe ‘a Sione ki he ‘ofa, ‘i he’ene Kosipeli, pea pehee ki he’ene Tohi (‘Ipiseli). Ko Sione ‘a e Akonga ne pehee ko e ofi taha kia Sisu. ‘Oku fai’aki ‘ete ‘ofa ‘a e a’usia ‘oku te ma’u mei hono ‘ofa’i kita. ‘Oku tokanga makehe ‘a Sione ki he fe’ofa’aki he ne ne a’usia mo mamata tonu ‘a hono ‘ofa’i ia ‘e Sisu.
Ki’i taimi makehe ko eni ‘o Sisu mo ‘ene kau Ako, ‘oku talaange ‘e Sisu ‘a e mahu’inga ke nau fe’ofa’aki. ‘Ikai ngata ai ka ‘oku kamata ‘aki ‘a ‘ene pehee – “ko e fekau fo’ou”. Ko e fekau fo’ou ke mou “fe’ofa’aki”. Ko e ‘ilo’anga eni ‘o e kau muimui ‘o Kalaisi, ko e fe’ofa’aki! ‘Oku ‘ikai ‘ilo’i e kau muimui ‘o Kalaisi ‘i he lalahi moe fotunga ‘o e ngaahi falelotu, pe ko e Siasi polokalama lelei taha, pe fa’a lotu taha. “fe’ofa’aki” ‘a e ‘ilo’anga!
Fe’ofa’aki
Taimi ni’ihi ‘oku lomekina e “fe’ofa’aki” ‘e he me’a lahi, kau ai e fa’a fifili, fa’a fehu’i. Ka hoko ha me’a, ko e fakahinohino ke fe’ofa’aki. Malie ‘a e hili pee ‘o ‘ene fakahaa ‘a ‘ene ‘ilo e me’a ‘oku toka he loto ‘o Siutasi pea mo ‘ene teu lavaki pea kuo tu’u ‘a Siutasi ‘o huu ki tu’a ‘o ‘alu, hanga hake leva ‘o tala e fekau fo’ou – mo u fe’ofa’aki! ‘Oku ‘ikai ko e toutou fakataha ‘o fehu’i mo ‘eke ke mahino ‘a e haa mo e ha. Ko e pole ke kamata mei he ‘ofa.
Ne ui 'e Sisu e kau tisaipale mei he feitu'u kehekehe; mei he toutai, mei he 'ofisi 'o e tanaki tukuhau, mo feefua. 'E faingata'a ke mahino'i ka hanga 'e ha taha 'o ui ha ni'ihi ke tuku e ngaahi me'a 'oku nau fai faka'aho ka e 'muimui'. Te tau mo'utaafu'ua pea mo fesiosiofaki pea 'e 'asi fakaoli. Ka 'oku 'ikai fakaoli mo ngali kehe 'a e ui ko eni ke tuku e toutai, ke tuku e ngaue he 'ofisi, he ko e "ui 'e Sisu 'ene kau tisaipale".
Ko e faka'osi'osi eni 'a e muimui mo e feohi, pea 'e lava pee ke tau pehee, ko e taataaiku eni 'o e ako ngaue 'a e kau tisaipale. 'Omai 'e Sisu kinautolu 'o fakatangutu pea ne pehe - "ko e fekau fo'ou". Fakatokanga'i e me'a 'a e kau muimui ne fai he 'ave 'o Sisu 'o fakamaau'i pea mo tautau he kolosi ko hono tamate'i! Ne nau takitaha foki ki he'ene ngaue maheni. Ko e fokotu'u atu ke fai ai hano fakaa'ua'u ki he 'fekau fo'ou' - mo u fe'ofa'aki.
‘Ikai faingofua ke fai e me’a ni, ka ko e “kelesi” ‘a e ‘Otua ko e ‘ofa ope atu. ‘Oku kakapa ‘a e ‘ofa ko ia ki he lilo ‘oku ta’emahakulea. Malie ko e huu hake ‘a Pita he lotolotonga ‘o e tala ‘o e “fekau fo’ou” – ‘Eiki, ko e haa ‘oku ‘ikai ke u lava ai ‘o muimui atu he taimi ni?” Ko e fe’ofa’aki mo e ‘ofa ‘oku fusi mei he afo ‘o e “foaki” moe “li’aki”. Pea tali ‘e Sisu – te ke li’aki ko aa ho’o mo’ui ko e ‘uhi ko au? Ko e pole ia ‘o e fe’ofa’aki, ko e foaki mo’ui. Ko e pole ia ‘o e muimui faka-tisaipale – ko e li’aki mo’ui. Pea ke tau fai eni ki hotau ngaahi kaungaafononga!
Ko e okooko na’a tokoni ki he lau Folofola
| Posted by: Admin | Category: okooko | Print | |